Woh Boli Dil Ko Koi Beyaqeeni

Woh Boli Dil Ko Koi Be-Yakeeni Hai Mohabbat Mein


"Woh Boli Dil Ko Koi Be-Yakeeni Hai Mohabbat Mein
Main Bola Theek Hai Per Ishq To Imaan Hota Hai"

"Woh Boli Aarzuein Dil Ki Andar Bain Karti Hain
Main Bola Theek Hai Mujh Ko Sunayi Deti Hain"

"Woh Boli Hum To Jaise Eik Musalsal Dukh Ke Qaidi Hain
Main Bola Theek Hai Yeh Zindagi Dukh Ka Tasalsul Hai"

"Woh Boli Koi Shab To Khwab Mein Bhi Khwab Aatey Hain
Main Bola Theek Hai Kuch Hasratein Aisey Bhi Karti Hain"

"Woh Boli Baarishon Mein Aur Zyada Jaan Sulagti Hai
Main Bola Theek Hai Yeh Aag Paani Ke Masaail Hain"

"Woh Boli Raat Kyun Mushkil Sey Kat'ti Hai Judai Mein
Main Bola Waqt To Kaifiyatoon Ka Naam Hota Hai"

"Woh Boli Chahaton Mein Dard Ke Rehne Ki Khwahish Kyun
Main Bola Dard Ke Maarey Huvon Ko Chain Milta Hai"

"Woh Boli Rooh Ki Aasodgi Ko Kya Zaroori Hai
Main Bola Rooh Ko Aalodgi Achi Nahin Lagti"

"Woh Boli Chand Ki Aur Chandni Ki Kya Kahani Hai
Main Bola Aadam-o-Hawa ki Chahat Ki Nishaani Hai"

"Woh Boli Be-Saropa Khwahishein Beimar Rakhti Hain
Main Bola Aadmi Andar Ke Baton Se Nikla Hai"

"Woh Boli Door Reh Ker Dard Barh Jata Hai Seene Mein
Main Bola Qurbatein Bhi Hijar Ke Khudshe Barhaati Hain"

"Woh Boli Shaam Hotey Hi Udaasi Phail Jaati Hai
Main Bola Raat Bhi To Aansuon Sey Ishq Karti Hai"

"Woh Boli Zindagi Mein Tu Nahi To Zindagi Kab Hai
Main Bola Har Taraf Ik La-Ubali Maut Haawi Hai"

"Woh Boli Ishq Ka Apna Ilehda Rang Hota Hai
Main Bola Rang Ka Apna Ilehda Ishq Hota HAi"

"Woh Boli Dil Ko Koi Be-Wajah Sa Khauf Rehta Hai
Main Bola Ishq To Be-Baak Logon Ka Hi Shewa Hai"

"Mohabbat Eik Pal Bhi Sukh Nahi Deti Kaha Us Ne
Kaha MAin Ne Mohabbat Ke Ilawa Kaun Sa Sukh Hai"

"Mohabbat Shehar Bhar Mein Goonj Jaati Hai Kaha Us Ne
Kaha Main Ne Mohabbat Ke Cchupa Rehne Ki Khwaish Kyun"

"Mohabbat Chup Nahi Rehti Kisi Pal Bhi Kaha Us Nay
Kaha Main Ney Mohabbat Bin To Kayinaat Goongi Hai"

"Mohabbat Zehan Ka Ik Khaas Aalim Hai Kaha Us Ney
Kaha Main Ney Mohabbat Rooh Ki Dehleez Hoti Hai"

"Mohabbat Be-Sabab Tarpaye Rakhti Hai Kaha Us Ney
Kaha Main Ney K Yeh Asbaab Kya Shai Hain Mohabbat Mein"

"Woh Kehti Hai Sitaarey Aansuon Mein Kyun Chamakte Hain
Main Kehta Hoon Mohabbat Roshni Mein Rang Bharti Hai"

"Woh Kehti Hai Hawa K Haath Mein Kya Kya Nahi Aata
Main Kehta Hoon Jo Dehleezon Ke Andar Dafan Hota Hai"

"Woh Kehti Hai Zmaaney Ko Dilon Sey Ranj Kyunkar Hai
Main Kehta Hoon Yeh K Aazaar To Sadiyon Ki Qismat Hain"

"Woh Kehti Hai Tumhaare Baad Kyun Baarish Nahi Hoti
Main Kehta Hoon Meri Jaan Hijar Sehraon Mein Rehta Hai"

"Woh Kehti Hai Ke Khushiyon Mein Bhi Tum To Rone Lagte Ho
Main Kehta Hoon Meri Aankhon Ko Sawan Acha Lagta Hai"

"Woh Boli Tum Bhi Zindagi Se Rooth Jao Ge Farhat
Main Bola Han Shayed Maut Mujh Se Maan Jaye Gi"

"Woh Boli Tum Khushi Ke Geet Ko Mayoos Kartey Ho
Main Bola Kya Karoon In Mukhtasar Geeton Ka Mausam Hai"

"Woh Boli Tum To Khud Hi Khud Sey Haar Jaatey Ho
Main Bola Kya Karoon Kamzor Hoon Aur Be-Sahara Hoon"

"Woh Boli Kya Yeh Sab Kuch Itefaqan Hai Tumharay Gham
Main Bola Yeh Bhi Mumkin Hai Yeh Sab Kch Ehtaraman Ho"

"Wo Bol Mohabbat Mein Ghamon Ki Is Kadar Yalghar Kyun ?
Main Bola Tum Kisi Din Yeh To Apne Aap Se Poocho"

"Woh Kehti Hai  Suno ! Tumhara Khwab Kyun Toota
Main Kehta Hoon K Dil Mein Koi Kheench Parti Thi"

"Tumhari Shairy Mein Zindagi Ki Siskiyan Kyun Hain
Main Bola Aansuon Ki Ibtadayi Shakal Joh Thehri"

"Woh Kehti Hai Ke Main Kuch Muztarib Si Hoon
Main Kehta Hoon Tum To Meri Rooh Jaisi Ho"

"Woh Kehti Hai Tumein Kyun Khauf Aata Hai Hawaon Se
Main Kehta Hoon Deep To Aisey Hi Hote Hain"

"Woh Kehti Hai Chalo ! Hawa K Saath Chaltey Hain
Main Khamoshi Sey Us K Saath Chal Deta Hoon Bujhne Ko"

"Woh Mujh Se Poochti Hai Tum Kahan Gayab Ho Sadiyon Sey
Main Kehta Hoon Hazaron Waswason K Darmiyaan Gum Hoon"

"Woh Mujh Sey Poochti Hai Raat Ki Bechainiyan Kya Hain
Main Kehta Hoon Wohi Jo Dooriyon K Dil Mein Hoti Hain"

"Woh Mujh Sey Poochti Hai Khauf Ka Doraniya Kya Hai
Main Kehta Hoon Jo Dil Aur Gham Ka Hota Hai Museebat Mein"

"Woh Mujh Sey Poochti Hai Badlon Ki Umar Kitni Hai
Main Kehta Hoon Tamazat K Mutabiq Paniyon K Waqt Jitni Hai"

"Woh Mujhsey Poochti Hai Raat Itni Be-zuban Kyun Hai
Main Kehta Hoon Zuban To Dard Ki Shiddat Sey Hoti Hai"

"Woh Kehti Hai Yeh Khamoshi Bhi Kuch To Sochti Hogi
Main Kehta Hoon Wohi Jo Ghuftugo Ki Bheerr Mein Kho Jaye"

"Woh Kehti Hai K Kuch Dinon Sey Boltey Kam Ho
Main Kehta Hoon Kayi Dukh Bolney Sey Rok Detey Hain"

"Woh Kehti Hai Mujhey Yeh Soch Kr Batla Main Kaisi Hoon
Main Kehta Hoon! Sochne Mein Waqt Lagta Hai________
Main Kehta Hoon Tumhein Darya Kinarey Kaisey Lagtey Hein?
Woh Kehti Hai Tumhein Bicharey Saharey Kaisey Lagtey Hein?
Main Kehta Hoon Mujhey Tum Hansti Gaati Achi Lagti Ho"

"Woh Boli Raat Sey Kya Baat Kartey Ho Akeley Mein
Main Bola Dard Ki, Kuch Kuch Mohabbat Ki Judai Ki"

"Woh Boli Chand Kya Aata Hai Tum Sey Chonchlein Karney
Main Bola Haan Kabhi Sapnon K Aangan Mein Utarta Hai"

"Woh Boli Kaun Aksar Yaad Aata Hai Udaasi Mein
Main Bola Kuch Puraane Raaste, Bachpan, Aur Ik Larki"

"Woh Boli Dard Ki Lazzat Mein Parney Sey Kya Hasil
Main Bola Dard Ko Khush Khush Sahein Aur Kooch Kar Jayein"

"Woh Boli Zindagi To Daairon K Phailney Sey Hai
Main Bola Maut Bhi Ik Daaiira Hai Door Tak Phaila"

"Woh Boli Rooh K Andar Kahin Pr Aag Jalti Hai
Main Bola Haan Dhuan Main Ney Bhi Dekha Hai Nigahon Mein"

"Woh Boli Ik Dahekta Shor Sharyanon Mein Behta Hai
Main Bola Haan Badan Pr Aabley Maine Bhi Dekhein Hain"

"Woh Boli Saans Pr Bhi Dard K Korhay Barastey Hein
Main Bola Haan Lahoo Pr Neel To Mainey Bhi Dekhein Hain"

"Woh Boli Zaat Ki Teh Mein Na Jaaney Kya Niihaan Hoga
Main Bola Jism Pr Ubhri Waredon Sey Bhi Zahir Hai"

"Woh Boli Dag Zada Jeevan Chupati Phir Rahi Hoon
Main Bola Nakhanon Ki Zardiyon Ney Kr Diya Aryan"

"Woh Kehti Hai Teri Jaibon Mein Itney Khwab Kyunkar Hain
Main Kehta Hoon K Duniya Mein Mujhey Zinda Bhi Rehna Hai"

"Woh Kehti Hai Terey Kalar Pey Mitti Ka Nishaan Kaisey
Main Kehta Hoon K Majboori Alamat Chor Jati Hai"

"Woh Kehti Hai Teri Aawaz Mein Masoomiyat Si Hai
Main Kehta Hoon K Yeh Mazloomiyat K Baad Aati Hai"

"Woh Kehti Hai Tere Chehre Pey Karb-E-Be-Karsan Kaisa
Main Bola Dil Ney Chehrey Pr Zra Sa Rang Chora Hai"

"Woh Kehti Hai Terey Haathon Pey Zakhmon K Manazir Kyun
Main Kehta Hoon K Kuch Zevar Barey Anmol Hote Hain"

"Woh Boli Umar Beeti Koi Bhi Milne Nahi Aaya
Main Bola Umar Sey Poocho K Aakhir Umar Kyun Beeti"

"Woh Boli Husan Dhalney K Liye Hota Hai Lagta Hai
Main Bola Hussan Hun, Ya Bakht Ho, Ya Chand Sooraj Hun"

"Woh Boli Ab To Zulfon Mein Bhi Chandi Si Sarak Aayi Hai
Main Bola Rooh Tak Main Bhi Daraarhein Parr Gayi Hongi"

"Woh Boli Haath Dekho Be-Iradah Hi Larazte Hain
Main Bola Haath Dikhlao To Phir Dekho Bhi Himmat Sey"

"Woh Boli Zindagi Ka Aakhri Kirdaar Hairat Hai
Main Bola Maut Se Pehle Koi Ghar Baar Hairat Hai"

"Woh Mujh Sey Poochti Hai Badalon Ko Kab Bulao Gey
Main Kehta Hoon Tumhein Jab Dhoop Ka Mausam Sataye Ga"

"Woh Mujh Sey Poochti Hai Panchiyon Sey Aashnaayi Hai?
Main Kehta Hoon K Ashkon Ki Qitaron Sey Bhi Waqif Hoon"

"Woh Mujh Sey Poochti Hai Shehar Ki Buniyaad Mein Kya Hai
Main Kehta Hoon Kisi Jangal Ka Qatal_E_Aaam Hai Shayed"

"Woh Mujh Sey Poochti Hai Tum Samandar Mein Kabhi Utrey
Main Bola Ik Samandar Doosre Mein Kis Liye Utrey"

"Woh Kehti Hai Mujhey Mayoosiyan Rasta Nahi Deti
Main Kehta Hoon K Yeh Mayoosiyan Taqat Bhi Hoti Hain"

"Woh Kehti Hai Bohat Tanha Hoon Main Is Poori Duniya Mein
Main Kehta Hoon K Yeh Ehsaas To Ho Ga KHUDA Ko Bhi"

"Woh Kehti Hai K Mujh Pr Shehar K Wehshi Lapaktey Hain
Main Kehta Hoon K Tum Kirdaar Ko Seena-Sapar Kr Lo"

"Woh Kehti Hai Hajoom-E-Badrosh Sey Khauf Aata Hai
Main Kehta Hoon Mujhey Ujri Hui Galiyan Darati Hain"

"Woh Kehti Hai Mujhe Be-Hiss Zamaaney Sey Shikayat Hai
Main Kehta Hoon K Yeh Shikway Shikayat Rayigaan Hai Sab"

"Woh Boli Tum Kahan Gayab Rehtey Ho Raaton Ko
Main Bola Main To Bas Aawara Phirta Hoon Udaasi Mein"

"Woh Boli Phone Bhi Aksar Bohat Engage Rakhtey Ho
Main Bola Be-Saropa Ghantiyon Sey Khauf Aata Hai"

"Woh Boli Tum Bohat Kanjoos Ho Khat Bhi Nahi Likhtey
Main Bola Khat Likhoon To Shaairi Naraaz Hoti Hai"

"Woh Boli Tum Kabhi Milney Chaley Aao Jo Mumkin Ho
Main Bola Yeh To Tum Ney Merey Dil Ki Baat Keh Di Hai"

"Woh Boli Aaj Mausam Mein Ajab Si Khushgawari Hai
Main Bola Haan Yeh Mausam Pyaar Sey Milne Ka Mausam Hai"

"Woh Kehti Hai K Ab Aawargi Sey Kuch Nahi Haasil
Mujhe Hairat Hai Yeh Sab Kuch Woh Mujh Pagal Sey Kehti Hai"

"Woh Kehti Hai Hawa To Baanjh Pan Taqseem Karti Hai
Main Kehta Hoon Magar Dharti Hawa K Bas Sey Bahir Hai"

"Woh Kehti Hai Shabein Dhokey Mein Rakhti Hain Hamesha Hi
Main Kehta Hoon Kahin Yeh To Nahi Dhoka Dinon Mein Ho"

"Woh Kehti Hai Mujhey To Zindagi Sey Eik Shikwa Hai
Hamesha Sailon Ko Maut K Saye Mein Rakhti Hai"

"Woh Kehti Hai KHUDA Milta To Us Sey Baat Karti Main
Main Kehta Hoon Magar Main To Khamoshi Bant'ta Rehta Hun"

"Woh Kehti Hai K Be-Zrar Rehna Nahi Acha
Main Kehta Hoon Kayi Achaiyan Bas Mein Nahi Hoteen"

"Woh Kehti Hai Meri Yaadon SeyKyunkar Door Rehtey Ho
Main Kehta Hoon Teri Parchaiyan Bas Mein Nahi Hoteen"

"Woh Kehti Hai Tumhari Kuch Dua Bhi To Koi Ho Gi
Main Kehta Hoon Jahan Tum Ho Yeh Raatein Bhi Wahin Hoteen"

"Ajab Ik Ma'noiyat Si Palat Aati Nazaron Mein
Tumhein Hum Dekhtey Bhi Aur Baatein Bhi Wahin Hoteen"

"Sitaarey Dekhney Aatey Mujhey Teri Mohabbat Mein
Woh Kehti Hai Sitaare Aur Sapne Jhoot Hotey Hain"

"Woh Kehti Hai K Ab Roun To Aansoo Chubhney Lagtey Hain
Main Kehta Hoon Kisi Shayar Sey Aankhein Maang Sakti Ho"

"Woh Boli Aas Ki Faslein Kayi Beeimar Hain Dil Mein
Main Bola Jis Tarah Mumkin Ho Sawan Ko Bula Lao"

"Woh Boli Main Adhoorey Qaidiyon Ki Saf Mein Shamil Hoon
Main Bola Is Ka Matlab Hai K Aazadi Nahi Mumkin"

"Woh Boli Kuch Likhoon To Ungliyon Sey Khoon Rasta Hai
Main Bola Main To Aisey Mein Bhi Apney Dil Sey Likhta Hoon"

"Woh Boli Dard Ney Asaab Ko Murda Bana Daala
Main Bola Ishq Ki Bechainiyon Sey Zindagi Kr Lo"

"Woh Kehti Hai Agar Sab Raastey Maswa Ho Jayein
Main Kehta Hoon To Phri Aap Tak Mehdood Ho Jayein"

"Woh Kehti Hai Agar Be-Chainiyan Be-Sod Ho Jayein
Main Kehta Hoon Fana Fi Alnar Hasat O Bod Ho Jayein"

"Woh Kehti Hai Agar Veraniyan Rastey Mein Aa Jayein
Main Kehta Hoon Hazaron Gham Bohat Sastey Mein Aa Jayein"

"Woh Kehti Hai Tumhein Takhti Pey Apney Harf Likh Doon To
Main Kehta Hoon Teri Baatein Merey Bastay Mein Aa Jayein"

"Woh Kehti Hai Balayein Jab Bhi Mera Naam Leti Hain
Main Kehta Hoon Tujhey Meri Duayein Thaam Leti Hain"

"Woh Mujh Sey Poochti Hai Mujh Sey Baatein Kyun Nahi Kartey
Main Kehta Hoon Abhi To Dekhney Ki Manzilon Per Hoon"

"Woh Mujh Sey Poochti Hai Shaam Kya Veraan Hoti Hai
Main Kehta Hoon K Yeh To Hijar Ki Pehchaan Hoti Hai"

"Woh Mujh Sey Poochti Hai Ratjagon Ka Rang Kaisa Hai
Main Kehta Hoon K Jaise Jaagney Waley Ki Aankhon Ka"

"Woh Mujh Sey Poochti Hai Hijar Ki Qismein Bhi Hoti Hain
Main Kehta Hoon Jitney Wasl Utney Hi Hijar Hote Hain"

"Woh Mujh Sey Poochti Hai Pyaar Ka Matlab Batao Gey
Main Kehta Hoon K Har Ik Baat Ka Matlab Nahi Hota"

"Woh Boli Raastey Mein Dard K Kitney Sumandar Hain
Main Bola Aahkri Jo Zabt Sey Bahir Nikal Aaye"

"Woh Boli Ab To Mujh Mein Zabt Ka Yara Nahi Baaqi
Main Bola Doobney Ko Phir To Tum Tayar Ho jao"

"Woh Boli Kayinaatein Is Qadar Simti Hui Hain Kyun
Main Bola Is Qadar Wasa't Kahan Sey Aayi Hai Tum Mein"

"Woh Boli Be_Saropa Zindagi Sey Kya Hua Hasil
Main Bola Kuch Bhi Ho, Kuch Bhi Na Ho,Aakhir Ajal To Hai"

"Mohabbat Mein Safar Kitna Zaroori Hai Woh Kehti Hai?
Main Kehta Hoon Mohabbat Mein Kahin Thehra Nahi Jaata"

"Woh Mujh Sey Poochti Hai Aashiyaney Jal Gay Hon Gey
Main Kehta Hoon K Shayed Itefaqan Bach Gaye Ho Gey"

"Woh Mujh Sey Poochti Hai Aaj Phir Goli Chali Ho Gi
Main Kehta Hoon K Han Kuch Mayatein Ayi Hain Basti Mein"

"Woh Mujh Sey Poochti Hai Aaj Bhi Kuch Bomb Phattey Ho Gey
Main Kehta Hoon Koi Kehraam To Barpa Tha Sarhkon Per"

"Woh Mujh Sey Poochti Hai Phir Adalat Mar Gayi Ho Gi
Main Kehta Hoon K Mujrim To Bazaat_E_Khud Hi Munsif Hain"

"Woh Mujh Sey Poochti Hai Baadshah-E-Waqt Kaisa Hai
Main Kehta Hoon Bohat Mutema'in Rehta Hai Bechara"

"Woh Kehti Hai Hawayein Raat Sey Aangan Mein Bethi Hain
Main Kehta Hoon Ghutan Apna Asar Dikhla K Chorey Gi"

"Woh Kehti Hai Khamoshi Farsh Per Saye Banati Hai
Mein Kehta Hoon Udaasi Weham Banti Ja Rahi Ho Gi"

"Woh Kehti Hai K Parchaiyaan Bhi Ab Humzaad Lagti Hai
Main Kehta Hoon K Tanhai NeyPagal Ker Diya Ho Ga"

"Woh Kehti Hai Meri Chat Per Hayoley Raqs Kartey Hain
Main Kehta Hoon K Yeh To WasWaso'on Ney Bheis Badla Hai"

"Woh Kehti Hai Koi Rota Hai Galiyon K Andheron Mein
Main Kehta Hoon Judai Phir Rahi Ho Gi Museebat Mein"

"Woh Mujh Sey Poochti Hai Kya Hai Kuch Hairaan Lagtey Ho
Main Kehta Hoon K Khud Ko Khwab Mein Hai Mutmayin Dekha"

"Woh Mujh Sey Poochti Hai Kya Hai Itney Mutma'in Kyun Ho
Main Kehta Hoon K Khud Ko Khwab Mein Hairaan Dekha Hai"

"Woh Mujh Sey Poochti Hai Muztarab Sey Lag Rahey Ho Kuch
Main Kehta Hoon K Dil Mein Ishq Ka Mehmaan Dekha Hai"

"Woh Mujh Sey Poochti Hai Kya Hai Kuch Pareshan Lagtay Ho
Main Kehta Hoon K Saarey Shehar Ko Veraan Dekha Hai"

"Woh Mujh Se Poochti Hai Badshagooni Ka Sabab Kya Hai
Main Us Sey Poochta Hoon Zindagaani Ka Adab Kya Hai"

"Woh Boli Aa Tujhey Main Raakh Ki Taseer Batlaon
Main Bola Raakh Ko Kya Raakh K Baarey Batao Gi"

"Woh Boli Aa Tujhey Main Dasht K Ma'ni Batati Hoon
Main Bola Aa Tujhe Apney Dil Mein Ley K Chalta Hoon"

"Woh Boli Aa Tujhey Main Zindagi Ki Fikar Samjhaon
Main Bola Maut K Maare Hue Ko Khoob Samjhao"

"Woh Boli Aa Tujhey Main Hijar Ka Mara Dikhati Hoon
Main Bola Haan Mujhey Tum Ley Chalo Merey Hi Kamrey Mein"

"Woh Kehti Hai Ghubaar-E-Waqt Mein Dhundla Gaya Jeevan
Main Kehta Hoon Palat Ker Dekhna Takleef Deta Hai"

"Woh Kehti Hai K Tum Mujh Ko Pukara Hi Nahi Kartey
Main Bola Kya Karoon Koi Gawara Hi Nahi Karta"

"Woh Mujh Sey Poochti Hai Kya Mujhey Tum Yaad Kartey Ho
Main Kehta Hoon K Jaan-E-Mann Tumhein Main Bhoolta Kab Hoon"

"Woh Kehti Hai K Ab To Rayigaan Lagta Hai Sara Kuch
Main Kehta Hoon Mujhey To Rayigaani Ka Bohat Dhoka Hai"

"Woh Kehti Hai Tamanayein Salamat Hi Nahi Ab To
Main Kehta Hoon K Jeevan Mein Yeh Thehrao Bhi Aata Hai"

"Woh Mujh Sey Poochti Hai Shorq-E-Chashm-E-Tamasha Kya Hai
Main Kehta Hoon K Yeh To Shorq-E-Alam Ka Hissa Hai"

"Woh Mujh Sey Poochti Hai Baiat-E-Sultaan-E-Gham Kyunkar
Main Kehta Hoon K Yeh Aadab Hain Rasm-E-Mohabbat K"

"Woh Mujh Sey Poochti Hai Jabar Per Sabar-E-Musalsal Kyun
Main Kehta Hoon K Jab Tak Jang Ki Soorat Nahi Milti"

"Woh Mujh Sey Poochti Hai Alam-E-Baala Kahan Per Hai
Main Kehta Hoon Hamari Fikar Ki Baalaayi Manzil Per"

"Woh Mujh Sey Poochti Hai Sab Qayam-O-Nazam Kaisey Hain
Main Kehta Hoon Koi To Hai Jisey Sab Theek Rakhna Hai"

"Woh Kehti Hai Main Rizq-E-Khaak Be-Ma'ni Hoon Duniya Mein
Main Kehta Hoon K Yeh Saara Nizaam-E-Aaadmiyat Hai"

"Woh Kehti Hai Main Ajz-E-Fitrat-E-Konain Hoon Jaanaan
Main Kehta Hoon Mujhey Maloom Hai Ay Azmat-E-Khaaki"

"Woh Kehti Hai Main Khwab-E-Noor-E-Baatin Hoon Sahifoon Mein
Main Kehta Hoon Kisey Inkaar Hai Ay Khwaish-E-Yazdan"

"Woh Kehti Hai Main Husn-E-Narmi-E-Ehsaas Hoon
Main Kehta Hoon K Main To Khud Gawah-E-Lams-E-Shabnam Hoon"

"Woh Kehti Hai K Main Khushboo-E-Itr-E-Surkhi-E-Subah Hoon
 Hawas Khamsa Aaalam Mujhey Mehsoos Kartey Hain"

"Woh Boli Main Aseer-E-Hijrat Hoon Zamaanon Sey
Main Bola Be-Thikana Pan To Sadiyon Ka Asasa Hai"

"Woh Boli Main Gul-E-Shaakh-E-Gham-E-Tanhai Hoon
Main Bola Main Mazar-E-Hijar Hoon Wehshat K Narghey Mein"

"Woh Boli Main Mata-E-Ghair Hoon Terey Liye
Main Bola Han Yeh Sadiyon Sey Mohabbat Ka Vateera Hai"

"Woh Boli Main Dar-E-Iwaan-E-Hairan Hoon Zamaney Mein
Main Bola Main Musaafir Hoon, Main Bola Main Musaafir Hoon"

"Woh Boli Main Husn-E-Taloo-E-Aaftaab Ka Manzar
Main Bola Han Agar Main Chashm-E-Beinaaye Tamanna Hoon"

"Woh Kehti Hai Andherey Raaston Sey Khauf Aata Hai
Main Kehta Hoon Abhi To Qabar Bhi Aani Hai Rastey Mein"

"Woh Kehti Hai Zamaney Ka Rawaiya Dil Mein Chubhta Hai
Main Kehta Hoon K Achi Baat Hai Tum Mukhtalif To Ho"

"Woh Kehti Hai K Jaanay Kyun Khamoshi Bhi Khatakti Hai
Main Kehta Hoon K Mumkin Hai Tumhein Kehna Ho Kuch Us Ney"

"Woh Kehti Hai Sumandar Sa Koi Rehta Hai Aankhon Mein
Main Kehta Hoon Kabhi Merey Bhi Dil Mein Jhaank Kar Dekho"

"Woh Kehti Hai Mujhe Sahil Sey Nafrat Hai Museebat Mein
Main Kehta Hoon K Yeh To Buzdali Hai Rayigaani Ki"

"Woh Boli Baarishon Sey Mustaqil Jhagrey Sey Kaya Haasil
Main Bola Baarishon Sey Har Ta'luq Teri Khaatir Hai"

"Woh Boli Main Majboor Hoon Jeevan K Changal Mein
Main Us K Jhoot Per Bola, Khuda Ka Reham Ho Tum Per"

"Woh Boli Ishq Hai To Ishq Mein Milna Milaana Kaya
Main Bola Ishq Ka Apna Nizaam-E-Wasl Hota Hai"

"Woh Boli Dooriyan To Kuch Mohabbat Kam Nahi Karti
Main Bola Han Magar Milney Ki Khwahish Ko Barhaati Hain"

"Woh Boli Saath Bandh Jaaney Sey Behtar Hai BicChar Jaayein
Main Us Ki Baat Per Dukh Sey Hansa Aur Kuch Nahi Bola"

"Woh Kehti Hai Safar Mein Kyun Sitaarey Saath Chaltey Hain
Main Bola Jis Tarah Darya Kinaarey Saath Chaltey Hain"

"Woh Mujh Sey Poochti Hai, Chand Ki Basti Kahan Per Hai
Main Us Ki Baat Per Us Ehad Mein Hairaan Hota Hoon"

"Woh Mujh Sey Poochti Hai, Kaun Sooraj Mein Sulagta Hai
Woh Mujh Sey Poochti Hai, Aur Dil Ko Thaam Leti Hai"

"Woh Mujh Sey Poochti Hai, Rooh Ki Larzish K Baarey Mein
Main Kehta Hoon K Yeh To Be-Qarari Raqas Karti Hai"

"Woh Mujh Sey Poochti Hai, Almiya Kya Cheez Hoti Hai
Main Kehta Hoon, Mohabbat Aur Nafrat Zindagi Aur Maut Hai Shayed"

"Woh Boli Sawanon Mein Ab Woh Pehley Rang Kam Kam Hain
Main Bola Ab Piya Bhi To Sukhi K Sang Kam Kam Hain"

"Woh Boli Nain Kuch Kehtey Hue Aksar Jhijhakte Hain
Main Bola Dil Mein Bethey Chor Ko Rasta Nahi Milta"

"Woh Kehti Hai K Jhanjhar Ab Tumhein Mayil Nahi Karti
Main Kehta Hoon Tumhein Ab Zindagi Qayil Nahi Karti"

"Woh Kehti Hai K Peeley Phool Bhi Khushboo Nahi Detey
Main Kehta Hoon, Judai Theek Sey Chubhti Nahi Dil Mein"

"Wo Kehti Hai Mohabbat Haadson Ko Kheench Laati Hai
Main Kehta Hoon Mohabbat Mo'jzon Ko Shakal Deti Hai"

"Woh Kehti Hai Hawayein Pairh Sey Manoos Hoti Hain
Main Kehta Hoon K Un K Darmiyan Rishta Purana Hai"

"Woh Kehti Hai Sadayein Parbaton Sey Laut Aati Hain
Main Kehta Hoon Un Ko Un Se Tukrana Nahi Aata"

"Woh Kehti Hai Fizayein Husn Sey Aabaad Rehti Hain
Main Kehta Hoon Agar Is Husn Ki Taqdees Baaqi Ho"

"Woh Kehti Hai Wafayein Shehar Sey Be_Zaar Kyunkar Hain
Main Kehta Hoon K Itne Chup Dar-O-Deewar Kyunkar Hain"

"Woh Kehti Hai Ghatayein Dasht K Is Paar Kyunkar Hain
Main Kehta Hoon K Yeh To Pyaas Ki Apni Karamat Hai"

"Woh Boli Aasmanon Ki Taraf Nazrein Nahi Uth'ti
Main Kehta Hoon K Shayed Bojh Parta Hai Nigahon Per"

"Woh Kehti Hai Zameen Pairon K Neechey Sard Kyunkar Hai
Main Kehta Hoon Zameen Hum Sey Bohat Naraz Rehti Hai"

"Kaha Us Ney Meri Itraaf Mujh Ko Qaid Rakhti Hain
Kaha Main Ney K In Itraaf Sey Bahir Nahi Kuch Bhi"

"Kaha Us Ney Darakht Apni Jarhon Sey Piyar Kartey Hain
Kaha Main Ney Jarhein Ik Roz In Ko Mar Deti Hain"

"Kaha Us Ne Khuda Achey Burey Ki Baat Sunta Hai
Kaha Main Ne, Usey Aawaz Ki Pehchaan Aati Hai"

"Woh Boli Main Chehaktey Badalon Ki Gungunahat Hoon
Main Bola Tum Mehakte Motiya Ki Muskurahat Ho"

"Woh Boli Main Suhaaney Mausamon K Geet Jaisi Hoon
Main Bola Tum Haseen Dehatiyon Ki Pareet Jaisi Ho"

"Woh Boli Main Chamakti Chaandni K Rang Jaisi Hoon
Main Bola Tum Mohabbat K Puraney Dhang Jaisi Ho"

"Woh Boli Main Lehakti Wadiyon Ki Khushbu Jaisi Hun
Main Bola Qaaf Ki Shehzadiyon Ki Khushbu Jaisi Ho"

"Woh Boli Main Sumandar Paar Janat Sey Aayi Hoon
Main Bola Main Tumhaarey Khaas Istaqbaal Ko Aaya"

"Woh Kehti Hai K Mujh Sey Titliyan Bhi Pyaar Karti Hain
Main Kehta Hoon Unhein Tum Baagh K Phooloon Si Lagti Ho"

"Woh Kehti Hai Mujhey Jugnoo Bhi Chooney K Liye Aayein
Main Kehta Hoon Tumhein Woh Chand Ki Mehmaan Samajhtey Hain"

"Woh Kehti Hai Meri Aawaz Ko Gunbad Tarastey Hain
Main Kehta Hoon Tumhari Baazgusht Toh Mehrbaan Chaahein"

"Woh Kehti Hain Main Hans Doon To Fizaayein Raqs Kar Uthein
Main Kehta Hoon Tou Ro Dey To Ghatayein Raqs Kar Uthein"

"Woh Kehti Hai Parindey Pyar Sey Mujh Ko Bulatey Hain
Main Kehta Hoon Shajar Aksar Terey Qissey Sunatey Hain"

"Woh Boli Dard Aksar Raat Ko Soya Nahi Karta
Main Bola Is Tarah To Koi Bhi Roya Nahi Karta"

"Woh Boli Hum To Ik Shaam-E-Ghareeban Ghar Mein Rakhtey Hain
Main Bola Karbala Waalon Sey Kuch Nisbat Theharti Hai"

"Woh Boli Dil Ki Veraani K Saye Cheekh Uth'tey Hain
Main Bola Raat K Pichley Pehar Ik Jashan Hota Hai"

"Woh Boli Dard Sey Aksar Koi Aawaz Aati Hai
Main Us Sey Poochta Hoon, Kaun Bichra Hai Jawani Mein"

"Woh Boli Eik Deewar-E-Ana Hayil Rahi Ab Tak
Main Bola Ab Talak Nuqsaan Bhi To Ho Chuka Kaafi"

"Woh Boli Raat K Maathey Pey Teeka Hai Suhagan Sa
Main Bola Han Yeh Peshani Anokhi Hai Zamaney Mein"

"Woh Boli Har Taraf Jangal Mein Ik Pazeib Bajti Hai
Main Bola Har Taraf Chanchal Hawa Phirti Hai Bhagi Si"

"Woh Boli Sardiyon Mein Dhoop Ki Hiddat Kabhi Dekhi
Main Bola Tum Ney Merey Lams Ki Shiddat Kabhi Dekhi"

"Woh Boli Baarishon Mein Shehar Dhul Jata Hai Lamhon Mein
Main Bola Han Magar Aankhein Bohat Thak Jaya Karti Hain"

"Woh Boli Garmiyon Mein Pairh Ki Cchaon Bulaati Hai
Main Bola Garmiyon Mein Pairh Bhi Kaisi Panaahein Hain"

"Woh Boli Zaat Ko Taqseem Hi Kartye Raho Gey Kaya
Main Bola Waqt K Apney Taqazey, Dil K Apney Hain"

"Woh Boli Phir Palat Aaye, Chaley To Phir Palat Aaye
Main Bola Band Koochey Ka Safar Hai Zindagi Apni"

"Woh Boli Har Sarak Jaati Hai Gham K Shehar Ki Janib
Main Bola Aur Agar Woh Shehar Apney DiL Mein Ho To Phir"

"Woh Boli Gham Hamesha Saath Deta Hai Museebat Mein
Main Bola Ik Zara Thehr, Mujhey Ghor Sey Dekho"

"Woh Boli Kya Zaroori Tha Mujhey Tum Saath Hi Rakhtey
Main Bola Rooh Bin Main Jism Kya Karta, Kahan Jata"

"Woh Boli Aa Gaya Hai Raitla Mosam Judayi Ka
Main Bola Main Tera Sehra Noord Mustaqil Thehra"

"Woh Boli Rait Urti Hai To Aankhon Mein Bhi Parti Hai
Main Bola Dard Ki Mari Hui Aankhon Ko Is Sey Kya"

"Woh Boli Raat Zakhmon Per Bohat Teesein Bhi Barsein Gi
Main Bola Zakhm Per Zakhmon K Seh Jaaney Ki Adat Hai"

"Woh Boli Aarzuon K Lahou Ka Zayiqa Kya Hai
Main Bola Talkh Hai, Meetha Hai, Karwa Hai,Raseela Hai"

"Woh Kehti Hai K Main To Maang Mein SoOoraj Sajaon Gi
Main Kehta Hoon K SoOoraj Ki Wazahat Ho Magar Pehley"

"Woh Kehti Hai Main Apney Dil Mein Ik Deewar Uthaon Gi
Main Kehta Hoon K Main Is Baat Ka Matlab Nahi Samjha"

"Woh Kehti Hai Main Aankhon Mein Koi Sehra Basaon Gi
Main Kehta Hoon K Beinaayi Jhulas Jaye Gi Aisey To"

"Woh Kehti Hai Main Pairhon Per Tumhara Bakht Likhun Gi
Main Kehta Hoon K Pairhon Sey Adawat Hai Tumhein Koi"

"Woh Kehti Hai Main Paani Per Tera Chehra Banaon Gi
Main Kehta Hoon Mujhey Lagta Hai Tera Dil Bhi Paani Tha"

"Woh Mujh Sey Poochti Hai,Tum Kisey Mujrim Samajhtey Ho
Main Kehta Hoon Usey Jo Dard KeMa'ni Na Samjha Ho"

"Woh Mujh Sey Poochti Hai, Jhoot Aur Sachaiyan Kya Hain
Main Kehta Hoon K Niyyat Aur Natasyij Ki Pazeerayi"

"Woh Mujh Sey Poochti Hai, Sab Sey Pehley Kaun Rehta Tha
Main Kehta Hoon K Andaza Ya Mafrooza Hi Mumkin Hai"

"Woh Mujh Sey Poochti Hai, Kaun Reh Jaye Ga Duniya Mein
Main Kehta Hoon K Bilkul Ik Nayi Aur Ajnabi Duniya"

"Woh Mujh Sey Poochti Hai, Maut K Baarey Mein Batao Gay
Main Kehta Hoon Khat-E-Tanseekh Hai Aaghaz Sey Pehley"

"Woh Mujh Sey Poochti Hai Jangalon Mein Kaun Rehta Hai
Main Kehta Hoon Wohi Jo Shehar Mein Rehney Sey Khayif Hain"

"Woh Mujh Sey Poochti Hai Aasmanon Sey Parey Kya Hai
Main Kehta Hoon Na Veraaney Na Aabadi Na Barbadi"

"Woh Mujh Sey Poochti Hai Waqt Ko Tum Kya Samajhtey Ho
Main Kehta Hoon K Har Ehsaas K A'dad Ki Ginti"

"Woh Mujh Sey Poochti Hai Kya Khuda Ko Mantey Ho Tum
Mian Kehta Hoon Yaqeenan Aur Usey Mehsoos Karta Hoon"

"Woh Mujh Sey Poochti Hai Yeh Mazaahib K Masaail Kya Hain
Main Kehta Hoon K Duniya K Barray Logon Ki Baatein Hain"

"Woh Mujh Sey Poochti Hai Khwab Ki Ta'beer K Baarey
Main Us Sey Poochta Hoon Aqal Ki Jaageer K Baarey"

"Woh Mujh Sey Poochti Hai Zindagi K Raaz K Baarey
Main Us Sey Poochta Hoon Dharkanon K Saaz K Baarey"

"Woh Mujh Sey Poochti Hai Raat Aur Din Ki Musaafat Kya
Main Kehta Hoon, Yeh Saaye Hain Kisi Qaidi Musaafir K"

"Woh Mujh Sey Poochti Hai, Hum Agar Kuch Bhi Nahi Hain To
Main Kehta Hoon, Nahi Hona Bhi Hota Hai Jahanon Mein"

"Woh Mujh Sey Poochti Hai, Aqal Kya Hai Aur Dil Kya Hai
Main Kehta Hoon K Ik Ikhtelaaf Amal Peiham Hai"

"Woh Kehti Hai K Deewanon Ka Koi Kya Bharosa Hai
Main Kehta Hoon Bharosey K Liye Duniya Hi Kaya Kam Hai"

"Woh Kehti Hai Kisi Ko Mat Bata Dena Merey Baarey
Main Kehta Hoon Magar Ik Geet Ko Aur Chandni Shab Ko"

"Woh Kehti Hai Suno, Mujhey Tum Set Mohabbat Hai
Main Kehta Hoon Meri Jaan Tum To Khud Meri Riyaazat Ho"

"Woh Kehti Hai Yeh Saarey Log Kyun Baatein Banatey Hain
Main Kehta Hoon Meri Jaan Yeh Mohabbat Ka Muqadar Hai"

"Main Kehta Hoon Mohabbat Kayinaati Geet Hoti Hai
Woh Thora Gunguna K Aansuon Mein Doob Jati Hai"

"Woh Mujh Sey Poochti Hai Har Taraf Ik Be Kali Kyun Hai
Main Kehta Hoon Koi Anjaam Aa Pohancha Hai Basti Mein"

"Woh Mujh Sey Poochti Hai Be_Sarosamaan Kab Sey Ho
Main Us Sey Poochta Hoon Is Qadar Nadaan Kab Sey Ho"

"Woh Mujh Sey Poochti Hai Kaun Lawaris Hai Muqtil Mein
Main Kehta Hoon Wohi Jo Qatal Karney K Liye Aaye"

"Woh Mujh Sey Poochti Hai Shehar Ki Haalat Ka Kya Ho Ga
Main Kehta Hoon Koi Din Mein Balaayein Laut Jayein Gi"

"Woh Mujh Sey Poochti Hai Karbala Kya Phir Barpa Ho Ga
Main Kehta Hoon Nahi Ab Is Qadar Tanha Nahi Koi"

"Woh Boli Dard K Us Paar Bhi Ik Dard Hota Hai"

Main Is K Baad Dair Tak Kuch Bhi Nahi Bola"