Tehzeeb Hafi Poetry - Tehzeeb Hafi Nazamein

تہذیب حافی کی نظمیں

✦ منتخب نظمیں ✦

— 1 —

تو کسی اور ہی دنیا میں ملی تھی مجھ سے
تو کسی اور ہی منظر کی مہک لائی تھی
ڈر رہا تھا کہ کہیں زخم نہ بھر جائیں مرے
اور تو مٹھیاں بھر بھر کے نمک لائی تھی
اور ہی طرح کی آنکھیں تھیں ترے چہرے پر
تو کسی اور ستارے سے چمک لائی تھی
تیری آواز ہی سب کچھ تھی مجھے مونس جاں
کیا کروں میں کہ تو بولی ہی بہت کم مجھ سے
تیری چپ سے ہی یہ محسوس کیا تھا میں نے
جیت جائے گا کسی روز ترا غم مجھ سے
شہر آوازیں لگاتا تھا مگر تو چپ تھی
یہ تعلق مجھے کھاتا تھا مگر تو چپ تھی
وہی انجام تھا جو عشق کا آغاز سے ہے
تجھ کو پایا بھی نہیں تھا کہ تجھے کھونا تھا
چلی آتی ہے یہی رسم کئی صدیوں سے
یہی ہوتا ہے یہی ہوگا یہی ہونا تھا
پوچھتا رہتا تھا تجھ سے کہ بتا کیا دکھ ہے
اور مری آنکھ میں آنسو بھی نہیں ہوتے تھے
میں نے اندازے لگائے کہ سبب کیا ہوگا
پر مرے تیر ترازو بھی نہیں ہوتے تھے
جس کا ڈر تھا مجھے معلوم پڑا لوگوں سے
پھر وہ خوش بخت پلٹ آیا تری دنیا میں
جس کے جانے پہ مجھے تو نے جگہ دی دل میں
میری قسمت میں ہی جب خالی جگہ لکھی تھی
تجھ سے شکوہ بھی اگر کرتا تو کیسے کرتا
میں وہ سبزہ تھا جسے روند دیا جاتا ہے
میں وہ جنگل تھا جسے کاٹ دیا جاتا ہے
میں وہ در تھا جسے دستک کی کمی کھاتی ہے
میں وہ منزل تھا جہاں ٹوٹی سڑک جاتی ہے
میں وہ گھر تھا جسے آباد نہیں کرتا کوئی
میں تو وہ تھا کہ جسے یاد نہیں کرتا کوئی
خیر اس بات کو تو چھوڑ بتا کیسی ہے
تو نے چاہا تھا جسے وہ ترے نزدیک تو ہے
کون سے غم نے تجھے چاٹ لیا اندر سے
آج کل پھر سے تو چپ رہتی ہے سب ٹھیک تو ہے

— 2 —

سفید شرٹ تھی تم سیڑھیوں پہ بیٹھے تھے
میں جب کلاس سے نکلی تھی مسکراتے ہوئے
ہماری پہلی ملاقات یاد ہے نا تمہیں
اشارے کرتے تھے تم مجھ کو آتے جاتے ہوئے
تمام رات وہ آنکھیں نہ بھولتی تھیں مجھے
کہ جن میں میرے لئے عزت اور وقار دکھے
مجھے یہ دنیا بیابان تھی مگر اک دن
تم ایک بار دکھے اور بے شمار دکھے
مجھے یہ ڈر تھا کہ تم بھی کہیں وہی تو نہیں
جو جسم پر ہی تمنا کے داغ چھوڑتے ہیں
خدا کا شکر ہے کہ تم ان سے مختلف نکلے
جو پھول توڑ کے غصے میں باغ چھوڑتے ہیں
زیادہ وقت نہ گزرا تھا اس تعلق کو
کہ اس کے بعد وہ لمحہ قریں قریں آیا
چھوا تھا تم نے مجھے اور مجھے محبت پر
یقین آیا تھا لیکن کبھی نہیں آیا
پھر اس کے بعد میرا نشۂ سکوت گیا
میں کشمکش میں تھی تم میرے کون لگتے ہو
میں امرتا تمہیں سوچوں تو میرے ساحر ہو
میں فارحہ تمہیں دیکھوں تو جون لگتے ہو
ہم ایک ساتھ رہے اور ہمیں پتہ نہ چلا
تعلقات کی حد بندیاں بھی ہوتی ہیں
محبتوں کے سفر میں جو راستے ہیں وہی
ہوس کی سمت میں پگڈنڈیاں بھی ہوتی ہیں
تمہارے واسطے جو میرے دل میں ہے حافیؔ
تمہیں میں کاش یہ سب کچھ کبھی بتا پاتی
اور اب مزید نہ ملنے کی کوئی وجہ نہیں
بس اپنی ماں سے میں آنکھیں نہیں ملا پاتی

— 3 —

تیرے ہونٹوں سے بہتی ہوئی یہ ہنسی
دو جہانوں پہ نافذ نہ ہونے کا باعث
ترے ہاتھ ہیں
جن کو تو نے ہمیشہ لبوں پر رکھا مسکراتے ہوئے
تو نہیں جانتی
نیند کی گولیاں کیوں بنائی گئیں
لوگ کیوں رات کو اٹھ کے روتے ہیں سوتے نہیں
تو نے اب تک کوئی شب اگر جاگتے بھی گزاری
تو وہ باربی نائٹ تھی
تجھ کو کیسے بتاؤں
کہ تیری صدا کے تعاقب میں
میں کیسے دریاؤں صحراؤں اور جنگلوں سے گزرتا ہوا
ایک ایسی جگہ جا گرا تھا
جہاں پیڑ کا سوکھنا عام سی بات تھی
جہاں ان چراغوں کو جلنے کی اجرت نہیں مل رہی تھی
جہاں لڑکیوں کے بدن صرف خوشبو بنانے کے کام آتے تھے
جہاں ایک معصوم بچہ پرندے پکڑنے کے سارے ہنر جانتا تھا
مجھ کو معلوم تھا
تیرا ایسے جہاں ایسی دنیا سے کوئی تعلق نہیں
تو نہیں جانتی
کتنی آنکھیں تجھے دیکھتے دیکھتے بجھ گئیں
کتنے کرتے ترے ہاتھ سے استری ہو کے جلنے کی خواہش میں کھونٹی سے لٹکے رہے
کتنے لب تیرے ماتھے کو ترسے
کتنی شہراہیں اس شوق میں پھٹ گئی ہیں
کہ تو ان کے سینے پہ پاؤں دھرے
میں تجھے ڈھونڈتے ڈھونڈھتے تھک گیا ہوں
اب مجھے تیری موجودگی چاہیے
اپنے ساٹن میں سہمے ہوئے سرخ پیروں کو اب میرے ہاتھوں پہ رکھ
میں نے چکھنا ہے ان کا نمک

— 4 —

جب وہ اس دنیا کے شور اور خاموشی سے
قطع تعلق ہو کے انگلش میں غصہ کرتی ہے
میں تو ڈر جاتا ہوں لیکن
کمرے کی دیواریں ہنسنے لگتی ہیں
وہ اک ایسی آگ ہے جس کو صرف دہکنے سے مطلب ہے
وہ اک ایسا پھول ہے جس پر اپنی خوشبو بوجھ بنی ہے
وہ اک ایسا خواب ہے جس کو دیکھنے والا خود مشکل میں پڑ سکتا ہے
اس کو چھونے کی خواہش تو ٹھیک ہے لیکن
پانی کون پکڑ سکتا ہے
وہ رنگوں سے واقف ہے
بلکہ ہر اک رنگ کے شجرے تک سے واقف ہے
اس کو علم ہے کن خوابوں سے آنکھیں نیلی پڑ جاتی ہیں
ہم نے جن کو نفرت سے منسوب کیا
وہ ان پیلے پھولوں کی عزت کرتی ہے
کبھی کبھی وہ اپنے ہاتھ میں پنسل لے کر ایسی سطریں کھینچتی ہے
سب کچھ سیدھا ہو جاتا ہے
وہ چاہے تو ہر اک چیز کو اس کے اصل میں لا سکتی ہے
صرف اسی کے ہاتھوں سے دنیا ترتیب میں آ سکتی ہے
ہر پتھر اس پاؤں سے ٹکرانے کی خواہش میں زندہ ہے
لیکن یہ تو اسی ادھورے پن کا جہاں ہے
ہر پنجرے میں ایسے قیدی کب ہوتے ہیں
ہر کپڑے کی قسمت میں وہ جسم کہاں ہے
میری بے مقصد باتوں سے تنگ بھی آ جاتی ہے تو
محسوس نہیں ہونے دیتی
لیکن اپنے ہونے سے اکتا جاتی ہے
اس کو وقت کی پابندی سے کیا مطلب ہے
وہ تو بند گھڑی بھی ہاتھ میں باندھ کے کالج آ جاتی ہے

— 5 —

کتنا عرصہ لگا ناامیدی کے پربت سے پتھر ہٹاتے ہوئے
ایک بپھری ہوئی لہر کو رام کرتے ہوئے
ناخداؤں میں اب پیچھے کتنے بچے ہیں
روشنی اور اندھیرے کی تفریق میں کتنے لوگوں نے آنکھیں گنوا دیں
کتنی صدیاں سفر میں گزاریں
مگر آج پھر اس جگہ ہیں جہاں سے ہمیں اپنی ماؤں نے
رخصت کیا تھا
اپنے سب سے بڑے خواب کو اپنی آنکھوں کے آگے اجڑتے ہوئے
دیکھنے سے برا کچھ نہیں ہے
تیری قربت میں یا تجھ سے دوری پہ جتنی گزاری
تیری چوڑیوں کی قسم زندگی دائروں کے سوا کچھ نہیں ہے
کہنیوں سے ہمیں اپنا منہ ڈھانپ کر کھانسنے کو بڑوں نے کہا تھا
تو ہم ان پہ ہنستے تھے اور سوچتے تھے کہ ان کو ٹشو پیپروں کی مہک سے الرجی ہے
لیکن ہمیں یہ پتا ہی نہیں تھا کہ ان پہ وہ آفات ٹوٹی ہیں
جن کا ہمیں اک صدی بعد پھر سامنا ہے
وبا کے دنوں میں کسے ہوش رہتا ہے
کس ہاتھ کو چھوڑنا ہے کسے تھامنا ہے
اک ریاضی کے استاد نے اپنے ہاتھوں میں پرکار لے کر
یہ دنیا نہیں دائرہ کھینچنا تھا
خیر جو بھی ہوا تم بھی پرکھوں کے نقش قدم پر چلو
اور اپنی حفاظت کرو
کچھ مہینے تمہیں اپنے تسمے نہیں باندھنے
اس سے آگے تو تم پہ ہے تم اپنی منزل پہ پہنچو یا پھر راستوں میں رہو
اس سے پہلے کہ تم اپنے محبوب کو وینٹیلیٹر پہ دیکھو
گھروں میں رہو

— 6 —

ترے پورے بدن پر اک مقدس آگ کا پہرہ ہے
جو تیری طرف بڑھتے ہوئے ہاتھوں کے ناخن روک لیتا ہے
ترے ہونٹوں سے نکلے سانس کی خوشبو
در و دیوار سے رستہ بنا کر سارے بر اعظموں میں پھیل سکتی ہے
تری بانہیں ابد کو جانے والی شاہراہیں ہیں
تری دائیں ہتھیلی کی لکیریں دوسری دنیاؤں کے نقشے ہیں جو ان منشیوں کے بس سے باہر ہیں
تری آنکھیں نہیں یہ دیوتاؤں کی پنہ گاہیں ہیں
جن میں وقت جیسے زہر کا تریاق ہے
تری زلفوں کی وسعت اس جہاں کی انتہاؤں سے پرے تک ہے
تری گردن کسی جنت کے پاکیزہ درختوں کے تنے کو دیکھ کر ترشی گئی ہے
ہمارے جسم پر سے تیری پرچھائی گزر جائے
تو ممکن ہے کہ ہم اس موت جیسے خوف سے آزاد ہو جائیں
ہمارے پاس ایسا کیا ہے جو تجھ کو بتا کر ہم تجھے قائل کریں
بس اتنا ہے کہ اپنے لفظ برسا کر تری چھتری پہ بارش پھینک دیں گے
یا ترے چہرے پہ اپنی نظم کی اک سطر سے چھاؤں کریں گے
دھوپ دے دیں گے
مگر کیا فائدہ اس کا کہ موسم خود ترے جوتوں کے تسموں سے بندھے ہیں
ترے ہم راہ چلنے کی کوئی خواہش اگر دل میں کبھی تھی بھی
تو ہم نے ترک کر دی ہے
ہم اس لائق نہیں ہیں
ہمیں معلوم ہے کہ اگلے وقتوں میں یہ لوگ
ترے پیروں کے سانچوں سے نئی سمتوں کے اندازے لگائیں گے

— 7 —

میں سپنوں میں
آکسیجن پلانٹ انسٹال کر رہا ہوں
اور ہر مرنے والے کے ساتھ مر رہا ہوں
میں اپنے لفظوں کے ذریعے
تمہیں سانسوں کے سیلینڈر بھیجوں گا
جو تمہیں اس جنگ میں ہارنے نہیں دیں گے
اور تمہاری دیکھ بھال کرنے
والوں کے ہاتھوں کو کانپنے نہیں دیں گے
آکسیجن اسٹاک ختم ہونے کی
خبریں گردش بھی کریں بھی تو کیا
میں تمہارے لیے
اپنے نظموں سے وینٹیلیٹر بناؤں گا
اسپتالوں کے بستر بھر بھی جائیں
کچھ لوگ تم سے بچھڑ بھی جائیں
تو حوصلہ مت ہارنا
کیوں کہ رات جتنی چاہے
مرضی کالی ہو گزر جانے کے لئے ہوتی ہے
رنگ اتر جانے کے لئے ہوتے ہیں
اور زخم بھر جانے کے لئے ہوتے ہیں

— 8 —

اک اشارے سے دیوار دل کی دراڑوں میں تو نے جو روشن کیے تھے چراغ
ان کے بجھنے کا دکھ ایک جیسا ہے دونوں طرف
آج بھی یاد ہے دور سے تیری آواز کانوں میں پڑتی تو کچھ بھی سنائی نہ دیتا
کاش تو اپنے زنداں سے مجھ کو رہائی نہ دیتا
کون بیتے ہوئے خواب پر خاک ڈالے
کون اتنی غلط فہمیوں کا ازالہ کرے
کس سے پوچھیں وبا اور وفا میں بنائے ہوئے بے تکلف تعلق
کی عمریں اگر مختصر ہیں تو کیوں ہیں
کون بھولے اماوس کی راتوں سی زلفوں کی رعنائیاں
کون دل سے حیا دار آنکھوں کی یادیں مٹا دے
دوست کس کو مفر ہے یہاں بے یقینی کے سیل بلا سے
دوست کشتی سنبھالی نہیں جا رہی اب ترے نا خدا سے
میں نے تیری رفاقت میں جتنی گزاری مرے ساتھ تیرے دلاسے کی برسات اور تیرے بولے ہوئے لفظ کی ہر تسلی ہمیشہ رہی ہے
میں نے تاریک رہداریوں میں کبھی تیری آنکھوں کی کرنوں کی بے فیضگی کا گلہ کر لیا
مونس جان ایسا بھی کیا کر لیا
غم تو تب تھا کہ میں تیرے جانے کا غم بھی نہ کرتا
میرے دن میری راتیں ترے سامنے ہیں
بتا ہاتھ کب تھامنے ہیں

Tehzeeb Hafi Poetry - Tehzeeb Hafi Shayari- Tehzeeb Hafi Ghazlein

تہذیب حافی کی غزلیں

✦ منتخب غزلیں ✦

— 1 —

تیرا چپ رہنا مرے ذہن میں کیا بیٹھ گیا
اتنی آوازیں تجھے دیں کہ گلا بیٹھ گیا

یوں نہیں ہے کہ فقط میں ہی اسے چاہتا ہوں
جو بھی اس پیڑ کی چھاؤں میں گیا بیٹھ گیا

اتنا میٹھا تھا وہ غصے بھرا لہجہ مت پوچھ
اس نے جس جس کو بھی جانے کا کہا بیٹھ گیا

اپنا لڑنا بھی محبت ہے تمہیں علم نہیں
چیختی تم رہی اور میرا گلا بیٹھ گیا

اس کی مرضی وہ جسے پاس بٹھا لے اپنے
اس پہ کیا لڑنا فلاں میری جگہ بیٹھ گیا

بات دریاؤں کی سورج کی نہ تیری ہے یہاں
دو قدم جو بھی مرے ساتھ چلا بیٹھ گیا

بزم جاناں میں نشستیں نہیں ہوتیں مخصوص
جو بھی اک بار جہاں بیٹھ گیا بیٹھ گیا

— 2 —

کسے خبر ہے کہ عمر بس اس پہ غور کرنے میں کٹ رہی ہے
کہ یہ اداسی ہمارے جسموں سے کس خوشی میں لپٹ رہی ہے

عجیب دکھ ہے ہم اس کے ہو کر بھی اس کو چھونے سے ڈر رہے ہیں
عجیب دکھ ہے ہمارے حصے کی آگ اوروں میں بٹ رہی ہے

میں اس کو ہر روز بس یہی ایک جھوٹ سننے کو فون کرتا
سنو یہاں کوئی مسئلہ ہے تمہاری آواز کٹ رہی ہے

مجھ ایسے پیڑوں کے سوکھنے اور سبز ہونے سے کیا کسی کو
یہ بیل شاید کسی مصیبت میں ہے جو مجھ سے لپٹ رہی ہے

یہ وقت آنے پہ اپنی اولاد اپنے اجداد بیچ دے گی
جو فوج دشمن کو اپنا سالار گروی رکھ کر پلٹ رہی ہے

سو اس تعلق میں جو غلط فہمیاں تھیں اب دور ہو رہی ہیں
رکی ہوئی گاڑیوں کے چلنے کا وقت ہے دھندھ چھٹ رہی ہے

— 3 —

یہ ایک بات سمجھنے میں رات ہو گئی ہے
میں اس سے جیت گیا ہوں کہ مات ہو گئی ہے

میں اب کے سال پرندوں کا دن مناؤں گا
مری قریب کے جنگل سے بات ہو گئی ہے

بچھڑ کے تجھ سے نہ خوش رہ سکوں گا سوچا تھا
تری جدائی ہی وجہ نشاط ہو گئی ہے

بدن میں ایک طرف دن طلوع میں نے کیا
بدن کے دوسرے حصے میں رات ہو گئی ہے

میں جنگلوں کی طرف چل پڑا ہوں چھوڑ کے گھر
یہ کیا کہ گھر کی اداسی بھی ساتھ ہو گئی ہے

رہے گا یاد مدینے سے واپسی کا سفر
میں نظم لکھنے لگا تھا کہ نعت ہو گئی ہے

— 4 —

پرائی آگ پہ روٹی نہیں بناؤں گا
میں بھیگ جاؤں گا چھتری نہیں بناؤں گا

اگر خدا نے بنانے کا اختیار دیا
علم بناؤں گا برچھی نہیں بناؤں گا

فریب دے کے ترا جسم جیت لوں لیکن
میں پیڑ کاٹ کے کشتی نہیں بناؤں گا

گلی سے کوئی بھی گزرے تو چونک اٹھتا ہوں
نئے مکان میں کھڑکی نہیں بناؤں گا

میں دشمنوں سے اگر جنگ جیت بھی جاؤں
تو ان کی عورتیں قیدی نہیں بناؤں گا

تمہیں پتا تو چلے بے زبان چیز کا دکھ
میں اب چراغ کی لو ہی نہیں بناؤں گا

میں ایک فلم بناؤں گا اپنے ثروتؔ پر
اور اس میں ریل کی پٹری نہیں بناؤں گا

— 5 —

بچھڑ کر اس کا دل لگ بھی گیا تو کیا لگے گا
وو تھک جائے گا اور میرے گلے سے آ لگے گا

میں مشکل میں تمہارے کام آؤں یا نہ آؤں
مجھے آواز دے لینا تمہیں اچھا لگے گا

میں جس کوشش سے اس کو بھول جانے میں لگا ہوں
زیادہ بھی اگر لگ جائے تو ہفتہ لگے گا

مرے ہاتھوں سے لگ کر پھول مٹی ہو رہے ہیں
مری آنکھوں سے دریا دیکھنا صحرا لگے گا

مرا دشمن سنا ہے کل سے بھوکا لڑ رہا ہے
یہ پہلا تیر اس کو ناشتے میں جا لگے گا

کئی دن اس کے بھی صحراؤں میں گزرے ہیں حافیؔ
سو اس نسبت سے آئینہ ہمارا کیا لگے گا

— 6 —

بتا اے ابر مساوات کیوں نہیں کرتا
ہمارے گاؤں میں برسات کیوں نہیں کرتا

محاذ عشق سے کب کون بچ کے نکلا ہے
تو بچ گیا ہے تو خیرات کیوں نہیں کرتا

وہ جس کی چھاؤں میں پچیس سال گزرے ہیں
وہ پیڑ مجھ سے کوئی بات کیوں نہیں کرتا

میں جس کے ساتھ کئی دن گزار آیا ہوں
وہ میرے ساتھ بسر رات کیوں نہیں کرتا

مجھے تو جان سے بڑھ کر عزیز ہو گیا ہے
تو میرے ساتھ کوئی ہاتھ کیوں نہیں کرتا

— 7 —

جب اس کی تصویر بنایا کرتا تھا
کمرا رنگوں سے بھر جایا کرتا تھا

پیڑ مجھے حسرت سے دیکھا کرتے تھے
میں جنگل میں پانی لایا کرتا تھا

تھک جاتا تھا بادل سایہ کرتے کرتے
اور پھر میں بادل پہ سایہ کرتا تھا

بیٹھا رہتا تھا ساحل پہ سارا دن
دریا مجھ سے جان چھڑایا کرتا تھا

بنت صحرا روٹھا کرتی تھی مجھ سے
میں صحرا سے ریت چرایا کرتا تھا

— 8 —

سو رہیں گے کہ جاگتے رہیں گے
ہم ترے خواب دیکھتے رہیں گے

تو کہیں اور ڈھونڈھتا رہے گا
ہم کہیں اور ہی کھلے رہیں گے

راہگیروں نے رہ بدلنی ہے
پیڑ اپنی جگہ کھڑے رہے ہیں

برف پگھلے گی اور پہاڑوں میں
سالہا سال راستے رہیں گے

سبھی موسم ہیں دسترس میں تری
تو نے چاہا تو ہم ہرے رہیں گے

لوٹنا کب ہے تو نے پر تجھ کو
عادتاً ہی پکارتے رہیں گے

تجھ کو پانے میں مسئلہ یہ ہے
تجھ کو کھونے کے وسوسے رہیں گے

تو ادھر دیکھ مجھ سے باتیں کر
یار چشمے تو پھوٹتے رہیں گے

— 9 —

عجیب خواب تھا اس کے بدن میں کائی تھی
وہ اک پری جو مجھے سبز کرنے آئی تھی

وہ اک چراغ کدہ جس میں کچھ نہیں تھا مرا
جو جل رہی تھی وہ قندیل بھی پرائی تھی

نہ جانے کتنے پرندوں نے اس میں شرکت کی
کل ایک پیڑ کی تقریب رو نمائی تھی

ہواؤ آؤ مرے گاؤں کی طرف دیکھو
جہاں یہ ریت ہے پہلے یہاں ترائی تھی

کسی سپاہ نے خیمے لگا دیے ہیں وہاں
جہاں پہ میں نے نشانی تری دبائی تھی

گلے ملا تھا کبھی دکھ بھرے دسمبر سے
مرے وجود کے اندر بھی دھند چھائی تھی

— 10 —

اس ایک ڈر سے خواب دیکھتا نہیں
میں جو بھی دیکھتا ہوں بھولتا نہیں

کسی منڈیر پر کوئی دیا جلا
پھر اس کے بعد کیا ہوا پتا نہیں

ابھی سے ہاتھ کانپنے لگے مرے
ابھی تو میں نے وہ بدن چھوا نہیں

میں آ رہا تھا راستے میں پھول تھے
میں جا رہا ہوں کوئی روکتا نہیں

تری طرف چلے تو عمر کٹ گئی
یہ اور بات راستہ کٹا نہیں

میں راہ سے بھٹک گیا تو کیا ہوا
چراغ میرے ہاتھ میں تو تھا نہیں

میں ان دنوں ہوں خود سے اتنا بے خبر
میں مر چکا ہوں اور مجھے پتا نہیں

اس اژدہے کی آنکھ پوچھتی رہی
کسی کو خوف آ رہا ہے یا نہیں

یہ عشق بھی عجب کہ ایک شخص سے
مجھے لگا کہ ہو گیا ہوا نہیں

خدا کرے وہ پیڑ خیریت سے ہو
کئی دنوں سے اس کا رابطہ نہیں

— 11 —

چہرہ دیکھیں تیرے ہونٹ اور پلکیں دیکھیں
دل پہ آنکھیں رکھیں تیری سانسیں دیکھیں

سرخ لبوں سے سبز دعائیں پھوٹی ہیں
پیلے پھولوں تم کو نیلی آنکھیں دیکھیں

سال ہونے کو آیا ہے وہ کب لوٹے گا
آؤ کھیت کی سیر کو نکلیں کونجیں دیکھیں

تھوڑی دیر میں جنگل ہم کو عاق کرے گا
برگد دیکھیں یا برگد کی شاخیں دیکھیں

میرے مالک آپ تو سب کچھ کر سکتے ہیں
ساتھ چلیں ہم اور دنیا کی آنکھیں دیکھیں

ہم تیرے ہونٹوں کی لرزش کب بھولے ہیں
پانی میں پتھر پھینکیں اور لہریں دیکھیں

— 12 —

اک حویلی ہوں اس کا در بھی ہوں
خود ہی آنگن خود ہی شجر بھی ہوں

اپنی مستی میں بہتا دریا ہوں
میں کنارہ بھی ہوں بھنور بھی ہوں

آسماں اور زمیں کی وسعت دیکھ
میں ادھر بھی ہوں اور ادھر بھی ہوں

خود ہی میں خود کو لکھ رہا ہوں خط
اور میں اپنا نامہ بر بھی ہوں

داستاں ہوں میں اک طویل مگر
تو جو سن لے تو مختصر بھی ہوں

ایک پھل دار پیڑ ہوں لیکن
وقت آنے پہ بے ثمر بھی ہوں

— 13 —

کچھ ضرورت سے کم کیا گیا ہے
تیرے جانے کا غم کیا گیا ہے

تا قیامت ہرے بھرے رہیں گے
ان درختوں پہ دم کیا گیا ہے

اس لیے روشنی میں ٹھنڈک ہے
کچھ چراغوں کو نم کیا گیا ہے

کیا یہ کم ہے کہ آخری بوسہ
اس جبیں پر رقم کیا گیا ہے

پانیوں کو بھی خواب آنے لگے
اشک دریا میں ضم کیا گیا ہے

ان کی آنکھوں کا تذکرہ کر کے
میری آنکھوں کو نم کیا گیا ہے

دھول میں اٹ گئے ہیں سارے غزال
اتنی شدت سے رم کیا گیا ہے

— 14 —

سب کی کہانی ایک طرف ہے میرا قصہ ایک طرف
ایک طرف سیراب ہیں سارے اور میں پیاسا ایک طرف

ایک طرف تمہیں جلدی ہے اس کے دل میں گھر کرنے کی
ایک طرف وہ کر دیتا ہے رفتہ رفتہ ایک طرف

میری مرضی تھی میں ذرے چنتا یا لہریں چنتا
اس نے صحرا ایک طرف رکھا اور دریا ایک طرف

میں نے اب تک جتنے بھی لوگوں میں خود کو بانٹا ہے
بچپن سے رکھتا آیا ہوں تیرا حصہ ایک طرف

جب سے اس نے کھینچا ہے کھڑکی کا پردہ ایک طرف
اس کا کمرا ایک طرف ہے باقی دنیا ایک طرف

یوں تو آج بھی تیرا دکھ دل دہلا دیتا ہے لیکن
تجھ سے جدا ہونے کے بعد کا پہلا ہفتہ ایک طرف

— 15 —

دل محبت میں مبتلا ہو جائے
جو ابھی تک نہ ہو سکا ہو جائے

تجھ میں یہ عیب ہے کہ خوبی ہے
جو تجھے دیکھ لے ترا ہو جائے

خود کو ایسی جگہ چھپایا ہے
کوئی ڈھونڈھے تو لاپتا ہو جائے

میں تجھے چھوڑ کر چلا جاؤں
سایا دیوار سے جدا ہو جائے

بس وہ اتنا کہے مجھے تم سے
اور پھر کال منقطع ہو جائے

دل بھی کیسا درخت ہے حافیؔ
جو تری یاد سے ہرا ہو جائے

— 16 —

صحرا سے آنے والی ہواؤں میں ریت ہے
ہجرت کروں گا گاؤں سے گاؤں میں ریت ہے

اے قیس تیرے دشت کو اتنی دعائیں دیں
کچھ بھی نہیں ہے میری دعاؤں میں ریت ہے

صحرا سے ہو کے باغ میں آیا ہوں سیر کو
ہاتھوں میں پھول ہیں مرے پاؤں میں ریت ہے

مدت سے میری آنکھ میں اک خواب ہے مقیم
پانی میں پیڑ پیڑ کی چھاؤں میں ریت ہے

مجھ سا کوئی فقیر نہیں ہے کہ جس کے پاس
کشکول ریت کا ہے صداؤں میں ریت ہے

— 17 —

نہ نیند اور نہ خوابوں سے آنکھ بھرنی ہے
کہ اس سے ہم نے تجھے دیکھنے کی کرنی ہے

کسی درخت کی حدت میں دن گزارنا ہے
کسی چراغ کی چھاؤں میں رات کرنی ہے

وہ پھول اور کسی شاخ پر نہیں کھلنا
وہ زلف صرف مرے ہاتھ سے سنورنی ہے

تمام ناخدا ساحل سے دور ہو جائیں
سمندروں سے اکیلے میں بات کرنی ہے

ہمارے گاؤں کا ہر پھول مرنے والا ہے
اب اس گلی سے وہ خوشبو نہیں گزرنی ہے

ترے زیاں پہ میں اپنا زیاں نہ کر بیٹھوں
کہ مجھ مرید کا مرشد اویسؔ قرنی ہے

— 18 —

میں نے یہ کب کہا ہے کہ وہ مجھ کو تنہا نہیں چھوڑتا
چھوڑتا ہے مگر ایک دن سے زیادہ نہیں چھوڑتا

کون صحراؤں کی پیاس ہے ان مکانوں کی بنیاد میں
بارشوں سے اگر بچ بھی جائیں تو دریا نہیں چھوڑتا

دور امید کی کھڑکیوں سے کوئی جھانکتا ہے یہاں
اور میرے گلی چھوڑنے تک دریچہ نہیں چھوڑتا

میں جسے چھوڑ کر تم سے چھپ کر ملا ہوں اگر آج وہ
دیکھ لیتا تو شاید وہ دونوں کو زندہ نہیں چھوڑتا

کون و امکان میں دو طرح کے ہی تو شعبدہ‌ باز ہیں
ایک پردہ گراتا ہے اور ایک پردہ نہیں چھوڑتا

سچ کہوں میری قربت تو خود اس کی سانسوں کا وردان ہے
میں جسے چھوڑ دیتا ہوں اس کو قبیلہ نہیں چھوڑتا

طے شدہ وقت پر وہ پہنچ جاتا ہے پیار کرنے وصول
جس طرح اپنا قرضہ کبھی کوئی بنیا نہیں چھوڑتا

پہلے مجھ پر بہت بھونکتا ہے کہ میں اجنبی ہوں کوئی
اور اگر گھر سے جانے کا بولوں تو کرتا نہیں چھوڑتا

لوگ کہتے ہیں تہذیب حافیؔ اسے چھوڑ کر ٹھیک ہے
ہجر اتنا ہی آسان ہوتا تو تونسہ نہیں چھوڑتا

— 19 —

ویسے میں نے دنیا میں کیا دیکھا ہے
تم کہتے ہو تو پھر اچھا دیکھا ہے

میں اس کو اپنی وحشت تحفے میں دوں
ہاتھ اٹھائے جس نے صحرا دیکھا ہے

بن دیکھے اس کی تصویر بنا لوں گا
آج تو میں نے اس کو اتنا دیکھا ہے

ایک نظر میں منظر کب کھلتے ہیں دوست
تو نے دیکھا بھی ہے تو کیا دیکھا ہے

عشق میں بندہ مر بھی سکتا ہے میں نے
دل کی دستاویز میں لکھا دیکھا ہے

میں تو آنکھیں دیکھ کے ہی بتلا دوں گا
تم میں سے کس کس نے دریا دیکھا ہے

آگے سیدھے ہاتھ پہ ایک ترائی ہے
میں نے پہلے بھی یہ رستہ دیکھا ہے

تم کو تو اس باغ کا نام پتا ہوگا
تم نے تو اس شہر کا نقشہ دیکھا ہے

— 20 —

شور کروں گا اور نہ کچھ بھی بولوں گا
خاموشی سے اپنا رونا رو لوں گا

ساری عمر اسی خواہش میں گزری ہے
دستک ہوگی اور دروازہ کھولوں گا

تنہائی میں خود سے باتیں کرنی ہیں
میرے منہ میں جو آئے گا بولوں گا

رات بہت ہے تم چاہو تو سو جاؤ
میرا کیا ہے میں دن میں بھی سو لوں گا

تم کو دل کی بات بتانی ہے لیکن
آنکھیں بند کرو تو مٹھی کھولوں گا

— 21 —

زخموں نے مجھ میں دروازے کھولے ہیں
میں نے وقت سے پہلے ٹانکے کھولے ہیں

باہر آنے کی بھی سکت نہیں ہم میں
تو نے کس موسم میں پنجرے کھولے ہیں

برسوں سے آوازیں جمتی جاتی تھیں
خاموشی نے کان کے پردے کھولے ہیں

کون ہماری پیاس پہ ڈاکا ڈال گیا
کس نے مشکیزوں کے تسمے کھولے ہیں

ورنہ دھوپ کا پربت کس سے کٹتا تھا
اس نے چھتری کھول کے رستے کھولے ہیں

یہ میرا پہلا رمضان تھا اس کے بغیر
مت پوچھو کس منہ سے روزے کھولے ہیں

یوں تو مجھ کو کتنے خط موصول ہوئے
اک دو ایسے تھے جو دل سے کھولے ہیں

منت ماننے والوں کو معلوم نہیں
کس نے آ کر پیڑ سے دھاگے کھولے ہیں

دریا بند کیا ہے کوزے میں تہذیبؔ
اک چابی سے سارے تالے کھولے ہیں

— 22 —

تاریکیوں کو آگ لگے اور دیا جلے
یہ رات بین کرتی رہے اور دیا جلے

اس کی زباں میں اتنا اثر ہے کہ نصف شب
وہ روشنی کی بات کرے اور دیا جلے

تم چاہتے ہو تم سے بچھڑ کے بھی خوش رہوں
یعنی ہوا بھی چلتی رہے اور دیا جلے

کیا مجھ سے بھی عزیز ہے تم کو دیے کی لو
پھر تو میرا مزار بنے اور دیا جلے

سورج تو میری آنکھ سے آگے کی چیز ہے
میں چاہتا ہوں شام ڈھلے اور دیا جلے

تم لوٹنے میں دیر نہ کرنا کہ یہ نہ ہو
دل تیرگی میں گھیر چکے اور دیا جلے

— 23 —

اشک ضائع ہو رہے تھے دیکھ کر روتا نہ تھا
جس جگہ بنتا تھا رونا میں ادھر روتا نہ تھا

صرف تیری چپ نے میرے گال گیلے کر دئے
میں تو وہ ہوں جو کسی کی موت پر روتا نہ تھا

مجھ پہ کتنے سانحے گزرے پر ان آنکھوں کو کیا
میرا دکھ یہ ہے کہ میرا ہم سفر روتا نہ تھا

میں نے اس کے وصل میں بھی ہجر کاٹا ہے کہیں
وہ مرے کاندھے پہ رکھ لیتا تھا سر روتا نہ تھا

پیار تو پہلے بھی اس سے تھا مگر اتنا نہیں
تب میں اس کو چھو تو لیتا تھا مگر روتا نہ تھا

گریہ و زاری کو بھی اک خاص موسم چاہیے
میری آنکھیں دیکھ لو میں وقت پر روتا نہ تھا

— 24 —

جانے والے سے رابطہ رہ جائے
گھر کی دیوار پر دیا رہ جائے

اک نظر جو بھی دیکھ لے تجھ کو
وہ ترے خواب دیکھتا رہ جائے

اتنی گرہیں لگی ہیں اس دل پر
کوئی کھولے تو کھولتا رہ جائے

کوئی کمرے میں آگ تاپتا ہو
کوئی بارش میں بھیگتا رہ جائے

نیند ایسی کہ رات کم پڑ جائے
خواب ایسا کہ منہ کھلا رہ جائے

جھیل سیف الملوک پر جاؤں
اور کمرے میں کیمرہ رہ جائے

— 25 —

جب کسی ایک کو رہا کیا جائے
سب اسیروں سے مشورہ کیا جائے

رہ لیا جائے اپنے ہونے پر
اپنے مرنے پہ حوصلہ کیا جائے

عشق کرنے میں کیا برائی ہے
ہاں کیا جائے بارہا کیا جائے

میرا اک یار سندھ کے اس پار
ناخداؤں سے رابطہ کیا جائے

میری نقلیں اتارنے لگا ہے
آئنے کا بتاؤ کیا کیا جائے

خامشی سے لدا ہوا اک پیڑ
اس سے چل کر مکالمہ کیا جائے

— 26 —

ہم تمہارے غم سے باہر آ گئے
ہجر سے بچنے کے منتر آ گئے

میں نے تم کو اندر آنے کا کہا
تم تو میرے دل کے اندر آ گئے

ایک ہی عورت کو دنیا مان کر
اتنا گھوما ہوں کہ چکر آ گئے

امتحان عشق مشکل تھا مگر
نقل کر کے اچھے نمبر آ گئے

— 27 —

قدم رکھتا ہے جب رستوں پہ یار آہستہ آہستہ
تو چھٹ جاتا ہے سب گرد و غبار آہستہ آہستہ

بھری آنکھوں سے ہو کے دل میں جانا سہل تھوڑی ہے
چڑھے دریاؤں کو کرتے ہیں پار آہستہ آہستہ

نظر آتا ہے تو یوں دیکھتا جاتا ہوں میں اس کو
کہ چل پڑتا ہے جیسے کاروبار آہستہ آہستہ

ادھر کچھ عورتیں دروازوں پر دوڑی ہوئی آئیں
ادھر گھوڑوں سے اترے شہسوار آہستہ آہستہ

کسی دن کارخانۂ غزل میں کام نکلے گا
پلٹ آئیں گے سب بے روزگار آہستہ آہستہ

ترا پیکر خدا نے بھی تو فرصت میں بنایا تھا
بنائے گا ترے زیور سنار آہستہ آہستہ

مری گوشہ نشینی ایک دن بازار دیکھے گی
ضرورت کر رہی ہے بے قرار آہستہ آہستہ

— 28 —

یہ کس نے باغ سے اس شخص کو بلا لیا ہے
پرند اڑ گئے پیڑوں نے منہ بنا لیا ہے

اسے پتا تھا میں چھونے میں وقت لیتا ہوں
سو اس نے وصل کا دورانیہ بڑھا لیا ہے

یہ رات نام نہیں لے رہی تھی کٹنے کا
چراغ جوڑ کے لوگوں نے دن بنا لیا ہے

درخت چھاؤں سے ہٹ کر بھی اور بہت کچھ ہے
یہ کیسی چیز تھی اور ہم نے کام کیا لیا ہے

کھرچ رہا ہوں میں دیوار پر لکھے ہوئے نام
عجیب طرح کی اک بے بسی نے آ لیا ہے

— 29 —

چیختے ہیں در و دیوار نہیں ہوتا میں
آنکھ کھلنے پہ بھی بیدار نہیں ہوتا میں

خواب کرنا ہو سفر کرنا ہو یا رونا ہو
مجھ میں خوبی ہے بیزار نہیں ہوتا میں

اب بھلا اپنے لیے بننا سنورنا کیسا
خود سے ملنا ہو تو تیار نہیں ہوتا میں

کون آئے گا بھلا میری عیادت کے لئے
بس اسی خوف سے بیمار نہیں ہوتا میں

منزل عشق پہ نکلا تو کہا رستے نے
ہر کسی کے لئے ہموار نہیں ہوتا میں

تیری تصویر سے تسکین نہیں ہوتی مجھے
تیری آواز سے سرشار نہیں ہوتا میں

لوگ کہتے ہیں میں بارش کی طرح ہوں حافیؔ
اکثر اوقات لگاتار نہیں ہوتا میں

— 30 —

خود پہ جب دشت کی وحشت کو مسلط کروں گا
اس قدر خاک اڑاؤں گا قیامت کروں گا

ہجر کی رات مری جان کو آئی ہوئی ہے
بچ گیا تو میں محبت کی مذمت کروں گا

جس کے سائے میں تجھے پہلے پہل دیکھا تھا
میں اسی پیڑ کے نیچے تری بیعت کروں گا

اب ترے راز سنبھالے نہیں جاتے مجھ سے
میں کسی روز امانت میں خیانت کروں گا

تیری یادوں نے اگر ہاتھ بٹایا میرا
اپنے ٹوٹے ہوئے خوابوں کی مرمت کروں گا

لیلۃ القدر گزاروں گا کسی جنگل میں
نور برسے گا درختوں کی امامت کروں گا

— 31 —

موسموں کے تغیر کو بھانپا نہیں چھتریاں کھول دیں
زخم بھرنے سے پہلے کسی نے مری پٹیاں کھول دیں

ہم مچھیروں سے پوچھو سمندر نہیں ہے یہ عفریت ہے
تم نے کیا سوچ کر ساحلوں سے بندھی کشتیاں کھول دیں

اس نے وعدوں کے پربت سے لٹکے ہوؤوں کو سہارا دیا
اس کی آواز پر کوہ پیماؤں نے رسیاں کھول دیں

دشت غربت میں میں اور مرا یار شب زاد باہم ملے
یار کے پاس جو کچھ بھی تھا یار نے گٹھڑیاں کھول دیں

کچھ برس تو تری یاد کی ریل دل سے گزرتی رہی
اور پھر میں نے تھک ہار کے ایک دن پٹریاں کھول دیں

اس نے صحراؤں کی سیر کرتے ہوئے اک شجر کے تلے
اپنی آنکھوں سے عینک اتاری کہ دو ہرنیاں کھول دیں

آج ہم کر چکے عہد ترک سخن پر رقم دستخط
آج ہم نے نئے شاعروں کے لیے بھرتیاں کھول دیں

— 32 —

دل کسی سمت کسی سمت قدم جاتا ہے
تیرے موجود کے چکر میں عدم جاتا ہے

اور تو کچھ نہیں ہوتا ترے ملنے سے مگر
ایک طوفان تعلق ہے جو تھم جاتا ہے

مجھ کو ساون میں کبھی خط نہ روانہ کرنا
جاتے جاتے ترے مکتوب سے نم جاتا ہے

اس لیے بولا اسے خود سے پرے جانے کا
جس طرف ہم اسے کہتے ہیں وہ کم جاتا ہے

رقص دوشیزۂ دنیا پہ نظر پڑتے ہی
جام جمشید مرے ہاتھ میں جم جاتا ہے

کسی دل سے کسی پہلو سے کسی دنیا سے
آدمی جاتا ہے کب رنج و الم جاتا ہے

نغمۂ طول شب ہجر مرے بس کا نہیں
میں اگر لے کو پکڑتا ہوں تو سم جاتا ہے

ہاتھ اٹھا لوں تو تری خوشبو چلی جائے گی
سر جھٹک دوں تو ترا دست ستم جاتا ہے

بعض اوقات ہواؤں کے تعاقب کے لیے
میں نہ جاؤں تو مرا نقش قدم جاتا ہے

— 33 —

رات کو دیپ کی لو کم نہیں رکھی جاتی
دھندھ میں روشنی مدھم نہیں رکھی جاتی

کیسے دریا کی حفاظت ترے ذمے ٹھہراؤں
تجھ سے اک آنکھ اگر نم نہیں رکھی جاتی

اس لیے چھوڑ کے جانے لگے سب چارہ گراں
زخم سے عزت مرہم نہیں رکھی جاتی

میرے اشکوں کی مدد چاہیے بتلاؤ مجھے
کون سے پھول پہ شبنم نہیں رکھی جاتی

ایسے کیسے میں تجھے چاہنے لگ جاؤں بھلا
گھر کی بنیاد تو اک دم نہیں رکھی جاتی

— 34 —

دل کو اب تجھ سے جدا ہو کر بھی جینا آ گیا
اس جھروکے میں ہوا کا تازہ جھونکا آ گیا

ان اندھیروں میں پہنچ پانا بہت دشوار تھا
میں تری آواز پر پلکیں جھپکتا آ گیا

احتراماً انگلیوں سے ہونٹ گیلے کر لیے
جب مری دہلیز پہ خود بہہ کے دریا آ گیا

اس جہاں میں میرے جیسا کوئی بد قسمت بھی ہے
جس نے جو کچھ بھی اتارا مجھ کو پورا آ گیا

وہ تو کہتا تھا کہ تم سے اچھے سو مل جائیں گے
آج اسے اس حال میں دیکھا تو رونا آ گیا

مارنے والا تھا اپنے آپ کو اس روز میں
پھر مری آنکھوں کے آگے اس کا چہرہ آ گیا

— 35 —

مجھے ان چھتریوں سے یاد آیا
تمہیں کچھ بارشوں سے یاد آیا

بہم آئی ہوا اور روشنی بھی
قفس بھی کھڑکیوں سے یاد آیا

مری کشتی میں اس نے جان دی تھی
مجھے ان ساحلوں سے یاد آیا

میں تیرے ساتھ چلنا چاہتا تھا
تری بیساکھیوں سے یاد آیا

ہزاروں چاہنے والے تھے اس کے
وہ جنگل پنچھیوں سے یاد آیا

بدن پر پھول مرجھانے لگے ہیں
تمہارے ناخنوں سے یاد آیا

— 36 —

وہاں اس نے جانے کی بات کی یہاں میرا چہرہ اتر گیا
مرا آئینہ مجھے دیکھ کر مرے خال و خد سے مکر گیا

وہ مرا نہیں بھی تو کیا ہوا مجھے اس کی خوشیاں عزیز ہیں
اسے پہلی بیٹی عطا ہوئی مرا گھر کھلونوں سے بھر گیا

میں محبتوں کی قبیل سے کسی گھر کا آخری فرد ہوں
کہیں چاند دیکھا تو رو پڑا کہیں پھول دیکھے تو ڈر گیا

ہمیں فرصتیں ہی کہاں ملیں کہ ہم ایک دوجے کو دیکھتے
کبھی چاند آ گیا ابر میں کبھی میں بھی چھت سے اتر گیا

مرے بے نیاز تری طلب کا معاملہ ہی کچھ اور ہے
کوئی تیری دھوپ میں جی اٹھا کوئی تیری چھاؤں میں مر گیا

تو پکارتا نہ پھرے کہیں مجھے دشت زعم گریز میں
میں ہوں ایک لمحۂ رائگاں میں گزر گیا تو گزر گیا

— 37 —

بھلا دیا تھا جس کو ایک شام یاد آ گیا
غزال دیکھ کر وہ خوش خرام یاد آ گیا

خدا کا شکر ہے کہ سانس ٹوٹنے سے پیشتر
وہ شکل یاد آ گئی وہ نام یاد آ گیا

وہ جس کی زلف آنچلوں کی چھاؤں کو ترس گئی
شب وصال اس کو احترام یاد آ گیا

میں پچھلے دس برس سے تیرے دل میں گھر نہ کر سکا
تری مزاحمت سے ویتنام یاد آ گیا

میں آج ایسٹوڈ کی ایک فلم دیکھ کر ہٹا
تو مجھ کو اک پرانا انتقام یاد آ گیا

— 38 —

موت خالی جگہ تھی جسے کوئی بھرنا نہیں چاہتا تھا
اس کے چہرے پہ لکھا ہوا ہے وہ مرنا نہیں چاہتا تھا

کیا بتاؤں کہ میں ابر ہوں سو مری اپنی مجبوریاں ہیں
ورنہ میں ان مکانوں سے ہو کر گزرنا نہیں چاہتا تھا

گھونسلوں میں پڑے سوچتے ہیں کہ ہم ان پرندوں میں ہوتے
وہ جنہیں اپنے پنجروں سے آزاد کرنا نہیں چاہتا تھا

جو ہمیں چھوڑ کر جا چکے ان کو اتنا بھی کیا یاد کرنا
چشم تر ایک دو اشک کافی تھے جھرنا نہیں چاہتا تھا

ہم مچھیروں نے اپنے سمندر بھی بدلے مگر کشتیوں پر
رزق کے نام کا اک پرندہ اترنا نہیں چاہتا تھا

اک پرانی مسافت کی مٹی تھی چہرے پہ تہذیبؔ ورنہ
کون تھا جو ترے آئنوں میں سنورنا نہیں چاہتا تھا

— 39 —

ترے خیال اور ترے دھیان سے پرے کا ہوں
میں ذائقہ ہوں اور تری زبان سے پرے کا ہوں

مرے لیے نہیں بنی ہیں یہ سمے کی سیڑھیاں
سو میں اتیت اور ورتمان سے پرے کا ہوں

تو کون ہے کہ جو مجھے مرے ہدف بتائے گا
میں تیر ہوں مگر تری کمان سے پرے کا ہوں

اگر نہیں ہوں میں تو پھر وجود کیا شعور کیا
اگر میں ہوں تو پھر میں اس جہان سے پرے کا ہوں

اگر چلوں تو دو قدم کے بعد یہ زمیں نہیں
اگر اڑوں تو تیرے آسمان سے پرے کا ہوں

کہا تھا میرے آگے اپنی نظم پیش مت کرو
کہ میں تمہارے شعری خاندان سے پرے کا ہوں